Շիրակի մարզի ազդակիր 21 համայնքների բնակիչներ ծանոթանում են Տրանշ-5-ի հողերի օտարման և տարաբնակեցման ծրագրի պատրաստման աշխատանքներին

29-04-2019

Ապրիլի 23-ից մայիսի 8-ը «Տրանսպորտային ծրագրերի իրականացման կազմակերպություն» ՊՈԱԿ-ի ներկայացուցիչները և հողերի օտարման և տարաբնակեցման գործընթացում ներգրավված խորհրդատու կազմակերպության  մասնագետներն այցելում են Շիրակի մարզի այն համայնքներ, որոնց մասնավոր և համայնքային սեփականություն հանդիսացող որոշ հողատեսքերի ու գույքի սահմանները հատվելու են Հյուսիս-հարավ ճանապարհային միջանցքի ներդրումային ծրագրի Տրանշ-5 Գյումրի-Բավրա և Բավրա շրջանցիկ ծրագրի իրականացման շրջանակներում։  

Եվրոպական ներդրումային բանկը Տեխնիկական աջակցության համագործակցության պայմանագրի շրջանակներում Տրանշ 5-ի (ընդհանուր երկարությունը՝ շուրջ 62 կմ) համար վարձել է նախագծման խորհրդատու «Լոթթի Ինջեներիա» ԲԸ, որը նախնական նախագիծ է ներկայացրել: Նախագիծն այժմ հատուկ համալիր փորձաքննության փուլում է։ Ներկայում մեկնարկել է նախագծի ազդեցության գոտում գտնվող հողերի օտարման և տարաբնակեցման ծրագրի նախապատրաստական փուլը:

Շիրակի մարզում այս ծրագրի շրջանակներում արդեն իսկ այցելություններ են կատարվել Բավրա, Սիզավետ, Թավշուտ, Ղազանչի, Աշոցք, Մեծ Սեպասար, Զույգաղբյուր, Կարմրավան և Վարդաղբյուր համայնքներ, կայացել են հանրային լսումներ բնակչության հետ, ներկայացվել են բոլոր այն գործընթացները, որոնց հետ առնչվելու են ազդակիր անձինք հողերի օտարման և տարաբնակեցման ծրագրի շրջանակներում։

ՊՈԱԿ-ի և խորհրդատու կազմակերպության մասնագետները պատասխանել են նաև համայնքների բնակիչների հարցերին, որոնք հիմնականում վերաբերում էին օտարման ենթակա հողերի արժեքներին, հողերի, ծառերի, մշակաբույսերի, շենք-շինությունների գնահատման մեխանիզմներին և այլն։

Նշենք, որ ըստ նախնական հաշվարկների՝ Տրանշ-5-ի ճանապարհաշինության ամբողջ հատվածում Շիրակի մարզի 21 համայնքներում ազդեցության են ենթարկվելու 1565 հողեր։

Առաջիկա օրերին հանրային իրազեկման հանդիպումներ են նախատեսված նաև Ցողամարգ, Թորոսգյուղ, Փոքրաշեն, Մայիսյան, Քեթի, Հացիկ, Կամո, Արևիկ, Շիրակ, Ախուրյան, Գյումրի, Ազատան համայնքներում։

Վերջին նորությունները

Կատարվում են եզրաքարերի տեղադրման, ջրահեռացման համակարգի վերականգնման աշխատանքներ

24-06-2019

2019թ. հունիսի 19-ի դրությամբ հողային աշխատանքների 90 տոկոսն ավարտված է: Այս պահին կատարվում են եզրաքարերի տեղադրման, ջրահեռացման համակարգի վերականգնման աշխատանքներ:

Կարդալ ավելին

Հանրային քննարկում՝ Բագրատաշենի նոր կամրջի շինարարության շրջակա միջավայրի վրա ազդեցությունների գնահատման թեմայով

21-06-2019

Բագրատաշենում արդեն իսկ իրականացվել է երկու հանրային քննարկում, որոնց ընթացքում ներկայացվել ու քննարկվել են նախագծի նախնական լուծումները, ինչպես նաև շրջակա միջավայրի վրա ազդեցության նախնական գնահատման հայտը։

Կարդալ ավելին

Հանրապետության 6 մարզերի շուրջ 47 կմ երկարությամբ կենսական նշանակության ճանապարհահատվածներում սկսվել են վերականգնման աշխատանքները

19-06-2019

Կենսական նշանակության ճանապարհների վերականգնման աշխատանքները ներառում են հողային պաստառի վերականգնում, ճանապարհային պատվածքի վերակառուցում, ճանապարհային անվտանգության ապահովում։ Վերականգնվելու են նաև ջրահեռացման համակարգերը, կատարվելու են կահավորման աշխատանքներ։

Կարդալ ավելին