Հիմնանորոգվում են Արարատի մարզի մի շարք գյուղերի ճանապարհները

30-04-2018 10:00
ՀՀ տրանսպորտի, կապի և տեղեկատվական տեխնոլոգիաների նախարարի պաշտոնակատար Վահան Մարտիրոսյանի հերթական աշխատանքային շրջայցը Արարատի տարածաշրջանի հիմնանորոգվող ճանապարհահատվածներում էր։
 
Միջպետական մայրուղուց դեպի Հովտաշեն հասնող ճանապարհի 2կմ-ից ավելի հատվածում երթևեկելի մասի վերականգնումից բացի նախատեսվում է նորոգել նաև այստեղ գտնվող 2 կամուրջները, վերականգնել ջրահեռացման համակարգը, կառուցել մայթեր ու կողնակներ։
 
 
 
 
Շինարարները, նախարարի պաշտոնակատարին ներկայացնելով աշխատանքների ընթացքը, նշեցին, որ վնասված ոռոգման համակարգի պատճառով մի շարք խնդիրներ էին առաջ եկել։ Դրանք վերացնելուց հետո միայն հնարավոր է եղել անցնել ճանապարհի վերականգնման աշխատանքներին։
 
«Կարևորը որակն է։ Ուշադրություն դարձրեք որակին»,-նշել է Վահան Մարտիրոսյանը:
 
Արդեն ավարտվել են եզրաքարերի  ապամոնտաժման, ճանապարհային ծածկի քանդման աշխատանքները։ Տեղադրվել են նոր, բազալտե եզրաքարեր ու վաքեր։
Ընթացքի մեջ է կամուրջներից մեկի հիմնանորոգումը, որի թռիչքային մասի վնասված հատվածներում կատարվում են ամրանների վերանորոգման աշխատանքներ և բետոնապատում։
 
Ակտիվ շինաշխատանքներ են ընթանում նաև Մ2 միջպետական մայրուղով Դիտակ-Ջրաշեն գյուղական համայնքերը կարճ ճանապարհով Նուբարաշենի խճուղուն կապող ճանապարհի 2կմ-ից ավելի հատվածում։
 
«30-տարուց ավելի այս ճանապարհը չի նորոգվել: Առավոտը 7-ից սկսում են աշխատանքը և մինչ ուշ երեկո աշխատում են»,- նշեց Դիտակ համայնքի ղեկավար Սուրեն Սրապոնյանը:
 
Համայքի ղեկավարը ներկայացնում է նաև վերջին տարիներին գյուղի ձեռքբերումները. նոր մանկապարտեզ է կառուցվել, դպրոց, ասում է՝ ճանապարհներն էլ որ նորոգվեն, բնակիչների կենսակերպն ավելի կլավանա։
 
 
 
Շինաշխատանքներն իրականացնում է «Կապավոր» ընկերությունը։ Այստեղ ևս ճանապարհի պատվածքն ամբողջությամբ կթարմացվի, կվերականգնվի ջրահեռացման համակարգը, կմաքրվեն ու կնորոգվեն ջրթող խողովակները, մայթեր կկառուցվեն, նոր վաքեր և մետաղական խողովակներ կտեղադրվեն։
 
Ջրաշեն համայնքի ղեկավար Արտյոմ Ղազարյանն էլ իր գոհունակությունն է ներկայացնում աշխատանքների ընթացքից։ «Մեր այս ճանապարհը, որ կարևոր նշանակություն ունի մեր գյուղացիների համար, շատ ահավոր վիճակում էր։ Շատ երկար տարիներ ենք սպասել, որ այս աշխատանքներն իրականացվեն, իսկ հիմա կատարվում են»,-նշեց նա:
 
Արևշատ-Աբովյան գյուղական համայնքներն իրար կապող ճանապարհի ավելի քան 1,5 կմ հատվածում ևս հիմնանորոգման ակտիվ աշխատանքներ են ընթանում:
 
Բնակիչները ևս անհամբերությամբ են սպասում դրանց ավարտին։
Հին եզրաքարերն արդեն հեռացվել են, փոխարենը տեղադրվել են 1826 գծմ նոր բազալտե եզրաքարեր, կառուցվել են 887գծմ բետոնե եզրաշարեր։ Ըստ անհրաժեշտության` կատարվել են գազատարի և ջրագծի տեղափոխման աշխատանքներ:
 
Աբովյան համայնքում վերականգնվում է նաև ոռոգման խողովակների վրա կառուցված կամրջի մակերևույթը։
 
Վահան Մարտիրոսյանը մեկ անգամ ևս ընդգծելով հիմնանորոգվող ճանապարների կարևորությունը՝ նշեց, որ թերացումները պետք է բացառվեն, ճանապարհները պետք է կառուցվեն որակով և երկար տարիների կյանք ունենան։
 
2018թ. մարտի 23-ից մեկնարկած՝ այս գյուղական համայնքների համար կենսական նշանակություն ունեցող ճանապարհների հիմնանորոգման աշխատանքները նախատեսված է ավարտել մինչև այս տարվա հոկտեմբերի 23-ը, սակայն շինարարները նախարարին խոստանում են որակի չափանիշները բարձր պահելով՝ ավարտել ամռանը։
 
Հիմնանորոգման աշխատանքներից բացի՝ կտեղադրվեն նաև ճանապարհային նշաններ, արգելապատնեշներ և արգելափակոցներ:

Վերջին նորությունները

Հայտարարվել է ճանապարհների հիմնանորոգման նախագծման և հեղինակային հսկողության մրցույթ

24-05-2019

Նախագծման փուլի ծառայություններն ակնկալվում է սկսել 2019 թվականի օգոստոս ամսին և ավարտել 2020 թվականի հունվարին: Հետաքրքրության հայտերը պետք է ներկայացնել մինչև 2019թ. հունիսի 07-ը՝ ժամը 18:00։

Կարդալ ավելին

Թումանյան քաղաքից մինչև Օձունի խաչմերուկ ճանապարհահատվածը ժամանակավորապես փակ է լինելու երթևեկության համար

24-05-2019

Մայիսի 27-ին՝ ժամը 15:00-19:00-ն ընկած հատվածում, ժայռապայթեցման աշխատանքների հետևանքով Թումանյան քաղաքից մինչև Օձունի խաչմերուկ ճանապարհահատվածը փակ է լինելու երթևեկության համար։

Կարդալ ավելին

Կապալառուները, տեխհսկողն ու պատվիրատուն քննարկեցին կենսական նշանակության ճանապարհների վերակառուցման հետ կապված հարցեր

24-05-2019

Հանդիպման ընթացքում քննարկվեցին և նախանշվեցին աշխատանքի կազմակերպման հիմնական ուղղությունները։ Նշվեց, որ առաջիկա մեկ շաբաթվա ընթացքում տեղի է ունենալու շինտեղամասերը կապալառուների տնօրինմանը հանձնելու գործընթացը։

Կարդալ ավելին